الخميس، 27 مارس، 2014

هنا العاصمة

هنا العاصمة
هنا العاصمة .. هنا الالوان القاتمة
هنا الغاز والبارود ومدرعه
هنا اللى كان ضد ...  وأصبح  مع
هنا الخبير الأمعه
هنا الشريف فالعقرب متهان
والحرامى متنغنغ فالمزرعه
وبكل فجر يا حضرات
هنا القضاء اللى  مع .
هنا العاصمة .. هنا الالوان القاتمة
هنا كان الايِــد فى الايِــد
وعملنا ثورة فصبحت عيــد
ولما دوقنا الحرية
تلاقى عبد  ! عشق عبودية
باع البلد وأشترى  سيد
هنا العاصمة .. هنا الالوان القاتمة
هنا الزيتى والكاكى
هنا الجيش وهناك مفيش
هنا المخبر هنا الشويش
هنا البوليس المنتشر
وهناك مفيش
هنا المجرم مع الظابط بياكل عيش
وهنا يا سادة نص الشعب فقير
وبرغم انه بيحارب
مخدش مشير
هنا العاصمة .. هنا الالوان القاتمة.
محمد جدوعه
27 / 3 / 2014

الأربعاء، 13 مارس، 2013

زحمـــــه





بحلم بيوم تكون فيه البلد
بضحكة منورة .. أحلى

 بس أنا زحمه

 أنا هوجه

وانا البحر الحزين  أياه

بلا مركب ولا  موجه

سكونى لسه بيعافر

مع الزحمه اللى جوايا

وقلبى عنيد وبيسافر

وحلمه بعيد بلا نهايه

عقيدته بالسكون كافر

لكنه لا أنهزم ابداً

ولا سلم ورفع رايا


*******

انا الهوجه اللى بتأخد ولا بتدى

وانا معايا وأنا ضدى

انا المجذوب اللى أنهزم

وعقله أسير ومصدى

انا الحلم اللى أتحلم 100 مرة

انا اللى بدادى فى قلبى

انه يصفى لو مرة

انا المصدوم وانا السكران

ومش فاضى

وبهزى بأى كلام عالمليان وعالفاضى

انا البرئ المتهم

وانا الجانى وانا القاضى

انا الأنسان اللى أرتكب

فى الست هانم دولته  

فعل خادش للحياء

انا الرجولة فى ذكرها

نا الشجاعة  وكبرياء


*******

من البداية وانا شايف شعاع الأمل بيقل

بقايا نظام ولاد صرمه

كــ سوس بيشل

ونخبة مهماش نخبة


تجيب السل

وقضا شا.م.خ على نفسه

وزنده من الفساد طافح يزيد عـ التل

وداخلية عايزة داخلية

عجزت ، دقنها كبرت وصارت خل

وسوق سودة على دمغاهم

فيها الفقير أنعدم وأنداس و أنذل

وأعلام ماسخ  ملوش لازمة

فُجر وفساد راسخ
  
فيكبروا الأزمة

ملعون أبوك أعلام

أخرك يا واطى (أتفو)

وفردة مـ الجزمة




جدوعه 8 / 3 / 2013

الثلاثاء، 11 ديسمبر، 2012

خــنت بلدى وبأعترف !!!!








فى الدستور بيفتى
أن سينا لفلسطين وطن
ضحكت من غلبى
ومن عقول ساكنها العَطن
قول نعم
ومش  ُمتهم
لو قلت
لا
وأعرف أكيد ان الإراده
بين كلمتين مَفهُمش
تالت
وأن البلد دى
من ولادها الأغبيه
تعبت ومرضت
ومن حزنها سكتت
ما قالت
وفى كل ليلة سقوط
دماء عالأرض تِسرى
ودموع عالخد
سالت
ووحوش قبل الممات
فى ميادينا تعلى ِ الِندا
و ثارت وصالت وجالت
ورُصاصة الندل تُغدر
وروح الشهيد
عالغدر ما هانت
ثوروا أو أستقروا
بس أحذورا
المرتشى  التالت

......
والجرح مش جرحى انا او جرحكوا او جرحها
الجرح؟؟
طعنة خيانة  فى قلب الوطن
وأنا شوفتها
فى خيبة الحكام
وفى رشوة الأقسام
وفى سقطة الإعلام
شفتها
والطوبتين تمنهم كام
فى مهاجمة الإسلام
شفتها
وكله أتحد فى طعنة خيانة
بقلب الوطن
..
مين فينا أسلامى ومين مكانشى
مين فينا أنجيلى ومين مكانشى
مين فينا ثـوار ومين مكانشى
مين فينا أحزاب ومين مكانشى
مين فينا نخبة ومين مكانشى
أنا خنت بلدى بصمتى وبأعترف
مين فيكوا يا سادة بطريقته
مخانشى ؟



القوسى ناراٌ بلا رماد
10.12.2012
.....



الثلاثاء، 27 نوفمبر، 2012

قطر الطيابه





يا قطر الطيابه

ليه على الملائكة  تدوس

ُركابك غلابه َ 

ُعمالك غلابه َ  

َشيالينك غلابه َ 

ولما تتغبا عالغلابه  ,....

بكل قسوة تدوس

يا حديد القطر أفهم!!!

وفهم كبارنا 

أن الضحايا ملايكه 

متقيلوش  بفلوس

وأن الهرجله وف سككنا واضحة

ونظامنا فيها مدهوس

عايزين خريطة واضحة

 لسككنا الحديد الفاضحة

والحل فيها مدروس


******

أب وأم وأبن ودم
وسكة حديد بتزيد الهم
وجرح كبير

أتعلينا منك

ودوقنا المر كتير

وفى كل دوسه منك

يطير أمامها وزير

هى الحلول عندنا
  
أساسها فى التغيير

وكأننا فى دايرة

وُكبارنا فيها حمير

أتعلموا مرة .

الحل فى التفكير


********
القوسى ناراٌبلا رماد
20.11.2012