أيام وبنعشها ( يومين مدرسة )
كل سنة وكل المصريين بخير وكل أب وكل أم بخير ......... !!!!!! أمبارح والنهاردة الصبح من الساعة 6 الصبح والدنيا طوارئ ( مش طوارئ مبارك ) عندنا والسبب بداية العام الدراسى وطوارئ تجهيز لوازم المدرسة طبعاً ده من أسبوع فات والزن شغال على الودان عايزين ( الزى مدرسى صيفى وشتوى وأعمل حسابك عايزن جاكت لما يصنعوه أنا سئلت عليه ولسة بيتصنع و عايزن مسطرة حلوة وقلم رصاص من الغالى وعايزين ألوان خشب وشمع وفلوماستر ) بدون أبداء أى أعتراض قلت حاضر من عنيا ، طبعاً ده الطريقه اللى بتبعها على طول هصهين وأجيب اللى على مزاجى ، كان أول يوم مدرسة لبنتى جنى أمبارح وقال مامتها عايزانى أروح معها المدرسة (مدرسة مين يا ماما أنا خلصت من زمان ) وكمان هيروح معانا ( السوبر وومن ) الأنسه رودينا ( السوبر وومن ) دى بنتى برضو ( سنتين ونصف ) بس حاجه أيه أخر منجاهه ، ده مُدرسة عفاريت بتعلم العفاريت طرق جديدة فى العفرته و الشقاوة وكمان هتروح معانا أختى أللى هى عمة جنى وطبعاً نانا أللى هى جدة جنى ( أمى ) وطبعاً طاطا اللى هو أبن عمة جنى طاطا ده ( مصطفى ) 3 سنوات ونصف نفس شريحة السوبر وومن بس على (مذكر) وطبعاً وطبعاً وطبعاً .......... لكن أنا كسرت حالة النقاش بصمت وصمود على موقفى ( مش رايح المدرسة ) وخيم السكون على ماما جنى قلت لها بكل طرق أملكها من الإقناع ( أنا لما اروح المدرسة أروح عشان أدفع فلوس ) وطبعاً المدير لو شافنى وده متوقع منه لآنه نشيط جداً هيبتسم وهيحسبنى جايب معايا القسط التانى وباقى المصروفات ... وأنا هتابع جنى عطول يعنى مسافر ولا حاجة ما انا جنبكم فى مصر أهو ( معلش يا حبيبتى روحى أنت وديها المدرسة لحد لما نحل مشكلة الباص ،،،) أنا قلت كدة وعينك ما تشوف ألا النور .... هات يا تصاريح وهات يا أخبار ( أشتراك الباص غالى شويه والمسافة يعنى مش بعيدة ) وهات ويك ويك أيوه لازم تشوفلك حل فى حكاية الباص ده أنا تعبت . ( تعبت من يومين مدرسة ) عايزين نرتاح بقى .
