قالوا ميزان القضا
رمز الشموخ والعدل
بصيت لفوق فى الفضا .!
رافع أيادى الدعا
ده مصر ملها غيرك
أنت الحكم العدل .
حكم القضا الهمام
بهدر دم الشهيد
وبرأ الحكام
وده برضوا أسمه عدل
....
قالت الثورة
قلبوا الميزان الخونة !!
ونزل الشعب الميدان كافة
يعدل بأيده أللى أنقلب
ده ميزانا مش مقلوب ..
أصلاً مفيش كافة
والعدل مات وأندفن
ورفعوا رايات الظلم
وعملوا 100 زفة
وأحنا مركبنا تتوه فى اليم
من كتر الشروخ و الظلم
عشان مفيش دفة
يا نظام غبى مرتشى
عيب وأختشى
أصل الكسوف يا مجدع
هو أبو العفة
...
بيقولوا أسفين يا مبارك
وأحنا غلطنيين
ومش متربيين
وأن الثوار دول عيال تييت وسخين
وعملاء خونة متسلطين
وان الحياة فى عهدك كانت ورد
وبعد الثورة صبحت طين
لا كُنا بننتخب
ولا كُنا حيرانين
لا كُنا بنشتكى من الجوع
ولاكُنا شحاتين .
ودلوقتى بقى فيه ثورة
قلبت كل حاجة علينا
ما أحنا كنا مبسوطين ...
أفهموا معنى الكلام يتقال ؟؟؟؟؟؟
انتوا كنتوا بتنهبوا وتكلوا وتشربوا
وتفسدوا
وتعربدوا وكأن الفساد عجل دهب
والكل بيعبده
ومش حاسين بناس على نفس الأرض عايشة ومش لاقين
وكام فلاح بيشقى وعرقه يسقى الطين
وأنت تحصد الجاهز
وفلاحنا مش عايش
مش عارف يسد الدين .
......
عشان مكناش موجدين
كنا
مهمشين
مخدرين
مخنوقين
كنا نيجى فى يوم نقول الحق
نلاقى نظام غبى
وداخلية راضعة غباوة
كنا نقول لا
وساعة متنزل على ظهورنا الجلد
يزيد طعم الحرية حلاوة
كنا عايشين كما الأنعام
ومتكتفة ايدينا
ومتكتفة روحنا
وعلى عنينا من سنين غشاوة
كنت عارف حقوقى يا بلد
مع أنى مأخدتهاش
بس حافظها من صغرى
وكنت بأتليها تلاوة
كانوا بيفهمونا وأحنا صغار
أن العسكر بيحمينا
أن النظام يحمينا
وأن مبارك وحده هزم اليهود
الله أكبر
ووحده حرر سينا
وأننا من غيره تروح أرضينا
وكبرت.....
وهما فضلوا برضوا
يقدسوه
ويعبدوه
ويفرعنوه
لما نهب فلوس أهالينا .
يا شعب أصحى وفوق
فى الصندوق أخر أمل
يأما مبارك يرجع لينا
القوسى ناراٌ بلا رماد
7 / 6 / 2012
